Міністэрства культуры Рэспублікі Беларусь

XXV Нацыянальны фестываль беларускай песні і паэзіі прайшоў у г. Маладзечна з 9 па 13 чэрвеня. Нацыянальны фестываль беларускай песні і паэзіі – гэта ўнікальная магчымасць пазнаёміцца з багатай культурнай спадчынай Беларусі, яе новымі тэндэнцыямі і стаць часткай вялікага фестывальнага руху, які аб'ядноўвае сэрцы і душы, што любяць і берагуць беларускае слова і песню.

12 чэрвеня фестываль урачыста адкрылі канцэртнай праграмай «Калі песня збірае сяброў».

Прэзідэнт Рэспублікі Беларусь Аляксандр Лукашэнка накіраваў прывітанне ўдзельнікам, арганізатарам і гасцям XXV Нацыянальнага фестывалю беларускай песні і паэзіі. Прывітанне ад Прэзідэнта зачытаў Міністр культуры Марат Маркаў.

Кіраўнік дзяржавы ў сваім прывітанні павіншаваў усіх з адкрыццём культурнага форуму, які стаў знакавай падзеяй і ўжо ў дваццаць пяты раз збірае аматараў музыкі і роднага слова.

«На некалькі дзён Маладзечна становіцца цэнтрам творчага жыцця краіны, дзе пераплятаюцца традыцыі і сучаснасць. На фестывальных сцэнах гучаць галасы знакамітых майстроў і маладых выканаўцаў, нараджаюцца цікавыя ідэі і праекты, якія адлюстроўваюць духоўную сілу і каштоўнасці беларускага народа», — гаворыцца ў прывітанні.

Прэзідэнт выказаў упэўненасць, што юбілейнае мерапрыемства падарыць гасцям і ўдзельнікам святочны настрой і незабыўныя імгненні яднання з сапраўдным мастацтвам.

Аляксандр Лукашэнка пажадаў усім добрага здароўя, поспехаў і новых дасягненняў.

Марат Маркаў у інтэрв'ю журналістам падкрэсліў:

— Для беларускай культуры, беларускай паэзіі і музыкі фестываль у Маладзечна, напэўна, з'яўляецца асноўным. Менавіта тут, у Маладзечна, 25 гадоў таму ён і задумваўся як мерапрыемства, якое павінна дапамагаць развіваць беларускую культуру і ў першую чаргу сучасную беларускую паэзію і музыку. Фестываль задумваўся як пляцоўка, на якой маладыя выканаўцы без фонаграмы будуць выконваць беларускія песні. Тое, што задумвалася на працягу 25 гадоў, працягваецца і сёння. І гэта дорага каштуе.

Міністр культуры нагадаў, колькі зорак эстрады заззяла на маладзечанскім небасхіле:

— Ён ствараўся як фестываль, які фарміраваў бы новыя зоркі. Так і адбылося. Руслан Аляхно, Ірына Дарафеева, Наталля Тамела выйшлі менавіта адсюль. І сёння ў нас ёсць гэтая магчымасць — працягваць садзейнічаць развіццю беларускай культуры.

На думку Марата Маркава, нягледзячы на салідны фестывальны ўзрост, перазагрузка форуму ў Маладзечна наўрад ці патрэбна:

— Я не ўпэўнены ў тым, што яго трэба кардынальна абнаўляць. Часам важна прытрымлівацца пэўных традыцый. Кожны год тут прысутнічае конкурс маладых выканаўцаў, які сапраўды дапамагае і маладым выканаўцам, і нам лепш разумець сваю культуру. Навошта гэта мяняць? Лепш умець захаваць і развіваць такія рэчы.

Кульмінацыяй фестывальнай праграмы па-сапраўднаму сталі 12 і 13 чэрвеня. У гэтыя дні прайшоў Нацыянальны конкурс маладых выканаўцаў беларускай эстраднай песні.

Уладальнікам Гран-пры Нацыянальнага конкурсу маладых выканаўцаў беларускай эстраднай песні, які прайшоў у рамках XXV Нацыянальнага фестывалю беларускай песні і паэзіі «Маладзечна-2026», стаў прадстаўнік Мінскай вобласці Даніла Усс. Пераможцаў вызначылі па выніках трэцяга тура рэспубліканскага этапу конкурсу, які прайшоў 13 чэрвеня ў Палацы культуры Маладзечна.

Першага месца ўдастоены яшчэ адзін прадстаўнік Мінскай вобласці Аляксей Буйда. Другое месца ў двух выканаўцаў — Ігара Мураўкіна (Мінская вобласць) і Іллі Кубракава (Магілёўская вобласць). Трэцяе месца падзялілі таксама два вакалісты: Юлія Сумкіна (Мінск) і Крысціна Жура (Гомельская вобласць). 

Фестываль завяршыўся канцэртам-прысвячэннем жанчыне, паколькі юбілейны фестываль праходзіць у Год беларускай жанчыны. У канцэртнай праграме прагучалі песні беларускіх кампазітараў і аўтараў тэкстаў. Задзейнічаны артысты беларускай эстрады, харэаграфічныя і дзіцячыя калектывы.